تسجيل جديد

قصيدة زجلية رومانسية

جا الحاج من الخدمة فالعشية !! دوْش وكلس يتفرج فالمغربية !! جات الحاجة وجابت الصينية !! شي مسمنات وبغريرات وزويتة بلدية !! قال ليها زيدي زيدي درتي مزية !! راني

السعادة الزوجية>قصيدة زجلية رومانسية
أم طارق 07:26 AM 08-26-2013
قصيدة , زجلية , رومانسية

قصيدة زجلية رومانسية

جا الحاج من الخدمة فالعشية !!
دوْش وكلس يتفرج فالمغربية !!
جات الحاجة وجابت الصينية !!
شي مسمنات وبغريرات وزويتة بلدية !!
قال ليها زيدي زيدي درتي مزية !!
راني جيعان وربي لي عالم بيا !!
الله يرضي عليك الحاجة ويخليك ليا !!
شربو أتاي وهضرو شوية !!
وقال ليها نوضي شوفي بلغتي فين هي !!
نخرجو نسرحو رجلينا أنا ونتيا !!
هو دخل للبيت يجبد الناي !!
وقال ليها صبري هاني جاي !!
وهي مشات تغسل الكيسان ديال أتاي !!
قال ليها ماديري والو زكــــاي !!
تانجيو ونعاونك فكلشي غي تهناي !!
قالت ليه شفتك وليتي رومنسي هاي هاي !!
وهو يجاوبها ماشفتي والو غي ستنَّاي !!
من اليوم مانتخاصمو مانتخالفو فالرَّاي !!
نوفر ليك كـــاع داك شي لي بغيتي وكاتمنَّاي !!
وإلا بغيتي غدا نديك للمدنية نشري ليك الرايب والميفاي !!

طلع المكي والسعدية للجبل !!
خطوة خطوة غادين بالمهل !!
الربيع والورود منظر يهبّْل !!
المكي ولا شاعر من وصل !!
واخا مابقات عندو صحة عيا وفشل !!
دا يشعر ويقول كليمات فشكل !!
قال للحاجة كانبغيك نتي الروح ونتي العقل !!
وهي تقول لعن الشيطان يا هاد الراجل !!
كون تحشم راك حشمتيني يعطيك الذل !!
ولكن كلمة نبغيك خرجات من فمك بحال العسل !!

قال ليها حطي راسك على كتافي !!
ويا السعدية بغيتك تعرفي !!
راني نبغيك بالقلب الصافي !!
ماحدك معايا ماعمرك تخافي
لي قرب ليك نشعل فيه العوافي !!
على قبلك نكتب الشعر وندير القوافي !!
إلا مرضتي نحطك فالحضن الدافي !!
ونكون ليك أنا دواك الشافي !!
نعيشو بجوج وخا غي ب أتاي والخبز الحافي !!
قصة حبنا غادي يكتبوها فالخنيشات ديال نيسكافي !!


منقول عن مجهول
المصدر : المنتدى التعاضدي بالمغرب - من قسم : السعادة الزوجية



جديد قسم : السعادة الزوجية

Up

RSS RSS 2.0 XML MAP HTML